raat kī zulfeñ bhīgī bhīgī aur aalam tanhā.ī kā
kitne dard jagā detā hai ik jhoñkā purvā.ī kā

uḌte lamhoñ ke dāman meñ terī yaad kī ḳhushbū hai
pichhlī raat kā chāñd hai yā hai aks tirī añgḌā.ī kā

kab se na jaane galiyoñ galiyoñ saa.e kī sūrat phirte haiñ
kis se dil kī baat kareñ ham shahr hai us har jaa.ī kā

ishq hamārī barbādī ko dil se duā.eñ detā hai
ham se pahle itnā raushan naam na thā rusvā.ī kā

sher hamāre sun kar aksar dil vaale ro dete haiñ
ham bhī liye phirte haiñ dil meñ dard kisī shahnā.ī kā

tum ho 'kalīm' ajab dīvāne baat anokhī karte ho
chaah kā bhī armān hai dil meñ ḳhauf bhī hai rusvā.ī kā

raat ki zulfen bhigi bhigi aur aalam tanhai ka
kitne dard jaga deta hai ek jhonka purwai ka

uDte lamhon ke daman mein teri yaad ki KHushbu hai
pichhli raat ka chand hai ya hai aks teri angDai ka

kab se na jaane galiyon galiyon sae ki surat phirte hain
kis se dil ki baat karen hum shahr hai us har jai ka

ishq hamari barbaadi ko dil se duaen deta hai
hum se pahle itna raushan nam na tha ruswai ka

sher hamare sun kar aksar dil wale ro dete hain
hum bhi liye phirte hain dil mein dard kisi shahnai ka

tum ho 'kalim' ajab diwane baat anokhi karte ho
chah ka bhi arman hai dil mein KHauf bhi hai ruswai ka