anā zada thā kahīñ par kahīñ par ān-zada
zamīñ kī zad se nikalne tak āsamān-zada

yahāñ pe dasht o samundar kī baat mat karnā
hamāre shahr kā har shaḳhs hai makān-zada

ḳhayāl-o-ḳhvāb ke mausam badalne vaale haiñ
hujūm vahm-o-tasavvur meñ hai gumān-zada

to bāl-o-par kī numā.ish pe harf aa jaatā
havā kā ruḳh na palaTtā agar uḌaan zada

hamāre ba.ad hameñ DhūñDne ke sab raste
hamārī ḳhaak meñ mil jā.eñge nishān-zada

bhañvar se Duub ke ubhrā to ye khulā mujh par
samundarī thiiñ havā.eñ maiñ bādbān-zada

sab apnā harf-e-ma.ānī banā rahe haiñ 'sharar'
ye lafz lafz to sadiyoñ se haiñ zabān-zada

ana zada tha kahin par kahin par aan-zada
zamin ki zad se nikalne tak aasaman-zada

yahan pe dasht o samundar ki baat mat karna
hamare shahr ka har shaKHs hai makan-zada

KHayal-o-KHwab ke mausam badalne wale hain
hujum wahm-o-tasawwur mein hai guman-zada

to baal-o-par ki numaish pe harf aa jata
hawa ka ruKH na palaTta agar uDan zada

hamare baad hamein DhunDne ke sab raste
hamari KHak mein mil jaenge nishan-zada

bhanwar se Dub ke ubhra to ye khula mujh par
samundari thin hawaen main baadban-zada

sab apna harf-e-maani bana rahe hain 'sharar'
ye lafz lafz to sadiyon se hain zaban-zada