mirā haal pūchh ke ham-nashīñ mire soz-e-dil ko havā na de
bas yahī duā maiñ karūñ huuñ ab ki ye ġham kisī ko ḳhudā na de

ye jo zaḳhm-e-dil ko pakā.e ham liye phir rahe haiñ chhupā.e ham
koī nā-shanās-e-mizāj-e-ġham kahīñ haath us ko lagā na de

tū jahāñ se aaj hai nukta-chīñ kabhī muddatoñ meñ rahā vahīñ
maiñ gadā-e-rāhguzar nahīñ mujhe duur hī se sadā na de

tab-o-tāb-e-ishq kā hai karam ki jamī hai mahfil-e-chashm-e-nam
zarā dekhiyo ai havā-e-ġham ye charāġh koī bujhā na de

vo jo shā.irī kā sabab huā vo mo.āmla bhī ajab huā
maiñ ġhazal sunā.ūñ huuñ is liye ki zamāna us ko bhalā na de

mera haal puchh ke ham-nashin mere soz-e-dil ko hawa na de
bas yahi dua main karun hun ab ki ye gham kisi ko KHuda na de

ye jo zaKHm-e-dil ko pakae hum liye phir rahe hain chhupae hum
koi na-shanas-e-mizaj-e-gham kahin hath us ko laga na de

tu jahan se aaj hai nukta-chin kabhi muddaton mein raha wahin
main gada-e-rahguzar nahin mujhe dur hi se sada na de

tab-o-tab-e-ishq ka hai karam ki jami hai mahfil-e-chashm-e-nam
zara dekhiyo ai hawa-e-gham ye charagh koi bujha na de

wo jo shairi ka sabab hua wo moamla bhi ajab hua
main ghazal sunaun hun is liye ki zamana us ko bhala na de

Source: Book : vo jo shairi ka sabab hua (Pg. 353) Author : Kaliim aajiz