mire āñsuoñ pe nazar na kar mirā shikva sun ke ḳhafā na ho
use zindagī kā bhī haq nahīñ jise dard-e-ishq milā na ho

ye ināyateñ ye navāzisheñ mire dard-e-dil kī davā nahīñ
mujhe us nazar kī talāsh hai jo adā-shanās-e-vafā na ho

tujhe kyā batā.ūñ maiñ be-ḳhabar ki hai dard-e-ishq meñ kyā asar
ye hai vo latīf sī kaifiyat jo zabāñ tak aa.e adā na ho

ye sharāb zer-e-hasīñ-ghaTā jo hai 'kaif' nāzish-e-mai-kada
kisī tishna-kām kī aarzū kisī tishna-lab kī duā na ho

mere aansuon pe nazar na kar mera shikwa sun ke KHafa na ho
use zindagi ka bhi haq nahin jise dard-e-ishq mila na ho

ye inayaten ye nawazishen mere dard-e-dil ki dawa nahin
mujhe us nazar ki talash hai jo ada-shanas-e-wafa na ho

tujhe kya bataun main be-KHabar ki hai dard-e-ishq mein kya asar
ye hai wo latif si kaifiyat jo zaban tak aae ada na ho

ye sharab zer-e-hasin-ghaTa jo hai 'kaif' nazish-e-mai-kada
kisi tishna-kaam ki aarzu kisi tishna-lab ki dua na ho

Source: Book : Junoon (Pg. 140) Author : Naseem Muqri Publication : Naseem Muqri (1990) Edition : 1990