dar-o-dīvār pe shakleñ sī banāne aa.ī
phir ye bārish merī tanhā.ī churāne aa.ī

zindagī baap kī mānind sazā detī hai
rahm-dil maañ kī tarah maut bachāne aa.ī

aaj kal phir dil-e-barbād kī bāteñ haiñ vahī
ham to samjhe the ki kuchh aql Thikāne aa.ī

dil meñ aahaT sī huī ruuh meñ dastak gūñjī
kis kī ḳhush-bū ye mujhe mere sirhāne aa.ī

maiñ ne jab pahle-pahal apnā vatan chhoḌā thā
duur tak mujh ko ik āvāz bulāne aa.ī

terī mānind tirī yaad bhī zālim niklī
jab bhī aa.ī hai mirā dil hī dukhāne aa.ī

dar-o-diwar pe shaklen si banane aai
phir ye barish meri tanhai churane aai

zindagi bap ki manind saza deti hai
rahm-dil man ki tarah maut bachane aai

aaj kal phir dil-e-barbaad ki baaten hain wahi
hum to samjhe the ki kuchh aql Thikane aai

dil mein aahaT si hui ruh mein dastak gunji
kis ki KHush-bu ye mujhe mere sirhane aai

main ne jab pahle-pahal apna watan chhoDa tha
dur tak mujh ko ek aawaz bulane aai

teri manind teri yaad bhi zalim nikli
jab bhi aai hai mera dil hi dukhane aai