ye baat alag hai mirā qātil bhī vahī thā
is shahr meñ tārīf ke qābil bhī vahī thā

āsāñ thā bahut us ke liye harf-e-muravvat
aur marhala apne liye mushkil bhī vahī thā

tābīr thī apnī bhī vahī ḳhvāb-e-safar kī
afsāna-e-mahrūmi-e-manzil bhī vahī thā

ik haath meñ talvār thī ik haath meñ kashkol
zālim to vo thā hī mirā saa.il bhī vahī thā

ham aap ke apne haiñ vo kahtā rahā mujh se
āḳhir saf-e-aġhyār meñ shāmil bhī vahī thā

maiñ lauT ke aayā to gulistān-e-havas meñ
thā gul bhī vahī shor-e-anādil bhī vahī thā

daave the 'zafar' us ko bahut bā-ḳhabarī ke
dekhā to mire haal se ġhāfil bhī vahī thā

ye baat alag hai mera qatil bhi wahi tha
is shahr mein tarif ke qabil bhi wahi tha

aasan tha bahut us ke liye harf-e-murawwat
aur marhala apne liye mushkil bhi wahi tha

tabir thi apni bhi wahi KHwab-e-safar ki
afsana-e-mahrumi-e-manzil bhi wahi tha

ek hath mein talwar thi ek hath mein kashkol
zalim to wo tha hi mera sail bhi wahi tha

hum aap ke apne hain wo kahta raha mujh se
aaKHir saf-e-aghyar mein shamil bhi wahi tha

main lauT ke aaya to gulistan-e-hawas mein
tha gul bhi wahi shor-e-anadil bhi wahi tha

dawe the 'zafar' us ko bahut ba-KHabari ke
dekha to mere haal se ghafil bhi wahi tha