صبح بہار و شام خزاں کچھ نہ کچھ تو ہو
بے نام زندگی کا نشاں کچھ نہ کچھ تو ہو

خاموشیوں کی آگ میں جلتا ہے مے کدہ
دل دادگان شعلہ رخاں کچھ نہ کچھ تو ہو

جینے کے واسطے کوئی صورت تو چاہیے
ہو شمع انجمن کہ دھواں کچھ نہ کچھ تو ہو

چپ چپ ہے موج اور کنارے اداس ہیں
اے زندگی کے سیل رواں کچھ نہ کچھ تو ہو

صبح ازل کا روپ کہ شام ابد کا گیت
سایہ ہو دھوپ ہو کہ گماں کچھ نہ کچھ تو ہو

ساقی نئے چراغ مبارک تجھے مگر
جو بجھ چکے ہیں ان کا بیاں کچھ نہ کچھ تو ہو

کوئی حسین گیت کوئی رس بھری غزل
یارو علاج غم زدگاں کچھ نہ کچھ تو ہو

مانا کہ تابؔ یوں بھی گزر جائے گی مگر
ذکر جمال گل بدناں کچھ نہ کچھ تو ہو