اے اہل وفا خاک بنے کام تمہارا
آغاز بتا دیتا ہے انجام تمہارا

جاتے ہو کہاں عشق کے بیداد کشو تم
اس انجمن ناز میں کیا کام تمہارا

اے دیدہ و دل کچھ تو کرو ضبط و تحمل
لبریز مئے شوق سے ہے جام تمہارا

اے کاش مرے قتل ہی کا مژدہ وہ ہوتا
آتا کسی صورت سے تو پیغام تمہارا

وحشتؔ ہو مبارک تمہیں بدمستی و رندی
جز عشق بتاں اور ہے کیا کام تمہارا

RECITATIONS نعمان شوق



00:00/00:00 اے اہل وفا خاک بنے کام تمہارا نعمان شوق