ye kis kī yaad kā dil par rafū thā
ki bah jaane pe āmāda lahū thā
chamakte haiñ jo patthar se yahāñ ab
unhīñ palkoñ meñ sail-e-ābjū thā
kashish tujh sī na thī tere ġhamoñ meñ
lab-o-lahja magar haañ hū-ba-hū thā
ujāle sī koī shai bach ga.ī thī
us ik lamhe meñ jab maiñ thā na tū thā
thamī ik nabz to uqda khulā ye
ḳhamoshī kā sarāpā hā-o-hū thā
mile ab ke to ro.e TuuT kar ham
gunāh apnī sazā ke rū-ba-rū thā
kabhī ḳhushbū huā karte the ham bhī
kabhī qissa hamārā kū-ba-kū thā
ye kis ki yaad ka dil par rafu tha
ki bah jaane pe aamada lahu tha
chamakte hain jo patthar se yahan ab
unhin palkon mein sail-e-abju tha
kashish tujh si na thi tere ghamon mein
lab-o-lahja magar han hu-ba-hu tha
ujale si koi shai bach gai thi
us ek lamhe mein jab main tha na tu tha
thami ek nabz to uqda khula ye
KHamoshi ka sarapa ha-o-hu tha
mile ab ke to roe TuT kar hum
gunah apni saza ke ru-ba-ru tha
kabhi KHushbu hua karte the hum bhi
kabhi qissa hamara ku-ba-ku tha
Source: Rooh-e-Ghazal,Pachas Sala Intekhab
Leave a comment