kyuuñ vasl meñ bhī aañkh milā.ī nahīñ jaatī
vo farq diloñ kā vo judā.ī nahīñ jaatī

kyā dhuum bhī nāloñ se machā.ī nahīñ jaatī
sotī huī taqdīr jagā.ī nahīñ jaatī

kuchh shikva na karte na bigaḌtā vo shab-e-vasl
ab ham se koī baat banā.ī nahīñ jaatī

dekho to zarā ḳhaak meñ ham milte haiñ kyūñkar
ye nīchī nigah ab bhī uThā.ī nahīñ jaatī

kahtī hai shab-e-hijr bahut zinda rahoge
māñgā karo tum maut abhī aa.ī nahīñ jaatī

vo ham se mukaddar haiñ to ham un se mukaddar
kah dete haiñ saaf apnī safā.ī nahīñ jaatī

ham sulh bhī kar leñ to chalī jaatī hai un meñ
bāham dil o dilbar kī laḌā.ī nahīñ jaatī

ḳhud dil meñ chale aaoge jab qasd karoge
ye raah batāne se batā.ī nahīñ jaatī

chhuptī hai 'jalāl' āñkhoñ meñ kab hasrat-e-dīdār
sau parde agar hoñ to chhupā.ī nahīñ jaatī

kyun wasl mein bhi aankh milai nahin jati
wo farq dilon ka wo judai nahin jati

kya dhum bhi nalon se machai nahin jati
soti hui taqdir jagai nahin jati

kuchh shikwa na karte na bigaDta wo shab-e-wasl
ab hum se koi baat banai nahin jati

dekho to zara KHak mein hum milte hain kyunkar
ye nichi nigah ab bhi uThai nahin jati

kahti hai shab-e-hijr bahut zinda rahoge
manga karo tum maut abhi aai nahin jati

wo hum se mukaddar hain to hum un se mukaddar
kah dete hain saf apni safai nahin jati

hum sulh bhi kar len to chali jati hai un mein
baham dil o dilbar ki laDai nahin jati

KHud dil mein chale aaoge jab qasd karoge
ye rah batane se batai nahin jati

chhupti hai 'jalal' aankhon mein kab hasrat-e-didar
sau parde agar hon to chhupai nahin jati

Source: Book : Intekhab-e-kalam  Miir Zamin Ali Jalal (Pg. 82)