davā baġhair koī tifl mar gayā to kyā huā
bas ek phuul hī to thā bikhar gayā to kyā huā

kabhī kabhī to raushnī bhī ik azāb-e-jāñ huī
vo chāñdnī se terī kokh bhar gayā to kyā huā

na raat hī sañvar ga.ī na raushnī hī mar ga.ī
añdherī bā.ulī meñ chāñd utar gayā to kyā huā

kamāl jugnuoñ kā thā ki raushnī meñ kho ga.e
fareb apne saa.e hī se Dar gayā to kyā huā

mire liye to ḳhvāb ek chashma-e-hayāt thā
kisī ko ḳhvāb ḳhvāb thā bikhar gayā to kyā huā

guzarte mausamoñ ke qāfile to rauñdte rahe
ġharīb koī sahn se guzar gayā to kyā huā

na maiñ koī savār huuñ na koī māl-dār huuñ
udhar rahā to kyā huā idhar gayā to kyā huā

dawa baghair koi tifl mar gaya to kya hua
bas ek phul hi to tha bikhar gaya to kya hua

kabhi kabhi to raushni bhi ek azab-e-jaan hui
wo chandni se teri kokh bhar gaya to kya hua

na raat hi sanwar gai na raushni hi mar gai
andheri bauli mein chand utar gaya to kya hua

kamal jugnuon ka tha ki raushni mein kho gae
fareb apne sae hi se Dar gaya to kya hua

mere liye to KHwab ek chashma-e-hayat tha
kisi ko KHwab KHwab tha bikhar gaya to kya hua

guzarte mausamon ke qafile to raundte rahe
gharib koi sahn se guzar gaya to kya hua

na main koi sawar hun na koi mal-dar hun
udhar raha to kya hua idhar gaya to kya hua