daa.eñ baazū meñ gaḌā tiir nahīñ khīñch sakā
is liye ḳhol se shamshīr nahīñ khīñch sakā

shor itnā thā ki āvāz bhī Dabbe meñ rahī
bhiiḌ itnī thī ki zanjīr nahīñ khīñch sakā

har nazar se nazar-andāz-shuda manzar huuñ
vo madārī huuñ jo rahgīr nahīñ khīñch sakā

maiñ ne mehnat se hathelī pe lakīreñ khīñchīñ
vo jinheñ kātib-e-taqdīr nahīñ khīñch sakā

maiñ ne tasvīr-kashī kar ke javāñ kī aulād
un ke bachpan kī tasāvīr nahīñ khīñch sakā

mujh pe ik hijr musallat hai hamesha ke liye
aisā jin hai ki koī piir nahīñ khīñch sakā

tum pe kyā ḳhaak asar hogā mire sheroñ kā
tum ko to mīr-taqī-'mīr' nahīñ khīñch sakā

daen bazu mein gaDa tir nahin khinch saka
is liye KHol se shamshir nahin khinch saka

shor itna tha ki aawaz bhi Dabbe mein rahi
bhiD itni thi ki zanjir nahin khinch saka

har nazar se nazar-andaz-shuda manzar hun
wo madari hun jo rahgir nahin khinch saka

main ne mehnat se hatheli pe lakiren khinchin
wo jinhen katib-e-taqdir nahin khinch saka

main ne taswir-kashi kar ke jawan ki aulad
un ke bachpan ki tasawir nahin khinch saka

mujh pe ek hijr musallat hai hamesha ke liye
aisa jin hai ki koi pir nahin khinch saka

tum pe kya KHak asar hoga mere sheron ka
tum ko to mir-taqi-'mir' nahin khinch saka

Videos
This video is playing from YouTube Videos
This video is playing from YouTube Umair Najmi