sahbā-e-nazar ke is chhalkāne ko kyā kahiye
us shoḳh kī āñkhoñ ke paimāne ko kyā kahiye

yuuñ barq ne phūñkā hai sab ḳhaak hue sapne
barbād nasheman ke afsāne ko kyā kahiye

de kar ġham-e-dil ab vo bīmār-e-mohabbat ko
samjhāte haiñ un ke is samjhāne ko kyā kahiye

ye soz-e-mohabbat hai jab sham.a huī raushan
jal jaatā hai chupke se parvāne ko kyā kahiye

baiThā hai abhī aa kar uTh kar abhī chal degā
dīvāna hai dīvāna dīvāne ko kyā kahiye

hāthoñ meñ liye patthar phirte haiñ mire pīchhe
apnoñ kī ye hālat hai begāne ko kyā kahiye

ronā mujhe aatā hai hālat pe tirī 'āfat'
ghar kī jo ye sūrat hai vīrāne ko kyā kahiye

sahba-e-nazar ke is chhalkane ko kya kahiye
us shoKH ki aankhon ke paimane ko kya kahiye

yun barq ne phunka hai sab KHak hue sapne
barbaad nasheman ke afsane ko kya kahiye

de kar gham-e-dil ab wo bimar-e-mohabbat ko
samjhate hain un ke is samjhane ko kya kahiye

ye soz-e-mohabbat hai jab shama hui raushan
jal jata hai chupke se parwane ko kya kahiye

baiTha hai abhi aa kar uTh kar abhi chal dega
diwana hai diwana diwane ko kya kahiye

hathon mein liye patthar phirte hain mere pichhe
apnon ki ye haalat hai begane ko kya kahiye

rona mujhe aata hai haalat pe teri 'afat'
ghar ki jo ye surat hai virane ko kya kahiye