mausam sūkhā sūkhā sā thā lekin ye kyā baat huī
keval us ke kamre meñ hī raat ga.e barsāt huī

maiñ ne samjhā, us ne samjhā, bhiiḌ meñ bhī ḳhāmoshī thī
dekhne vaale kuchh bhī na samjhe lekin phir bhī baat huī

bin māñge mil jaa.e motī to is ko taqdīr kaho
dāman phailā kar duniyā mil jaa.e to ḳhairāt huī

sankaT ke din the to saa.e bhī mujh se katrāte the
sukh ke din aa.e to dekho duniyā mere saat huī

jīvan ke is khel meñ apnā gyaan bhī dhokā detā hai
ulTe saare daav hamāre shah bhī dī to maat huī

jaate jaate tanhā.ī kā ġham dene vo aa.e the
tum hī bolo kyā ye un kī ulfat kī sauġhāt huī

'āzam' bhūlnā chāhe bhī to ab tak bhuul na paa.e vo
un kī yādoñ se vābasta aise merī zaat huī

mausam sukha sukha sa tha lekin ye kya baat hui
kewal us ke kamre mein hi raat gae barsat hui

main ne samjha, us ne samjha, bhiD mein bhi KHamoshi thi
dekhne wale kuchh bhi na samjhe lekin phir bhi baat hui

bin mange mil jae moti to is ko taqdir kaho
daman phaila kar duniya mil jae to KHairaat hui

sankaT ke din the to sae bhi mujh se katraate the
sukh ke din aae to dekho duniya mere sat hui

jiwan ke is khel mein apna gyan bhi dhoka deta hai
ulTe sare daw hamare shah bhi di to mat hui

jate jate tanhai ka gham dene wo aae the
tum hi bolo kya ye un ki ulfat ki saughat hui

'azam' bhulna chahe bhi to ab tak bhul na pae wo
un ki yaadon se wabasta aise meri zat hui