koī hamrāh nahīñ raah kī mushkil ke sivā
hāsil-e-umr bhī kyā hai ġham-e-hāsil ke sivā

ek sannāTā musallat thā guzargāhoñ par
zindagī thī bhī kahāñ kūcha-e-qātil ke sivā

har qadam hādse har gaam marāhil the yahāñ
apne qadmoñ meñ har ik shai rahī manzil ke sivā

thā misālī jo zamāne meñ samundar kā sukūt
kaun tūfān uThātā rahā sāhil ke sivā

apne markaz se har ik chiiz gurezāñ niklī
lailā har bazm meñ thī ḳhalvat-e-mahmil ke sivā

apnī rāhoñ meñ to ḳhud bo.e haiñ kāñTe us ne
dushman-e-dil ki nahīñ aur koī dil ke sivā

apnī taqdīr thā barbād-e-mohabbat honā
mahfileñ aur bhī thiiñ aap kī mahfil ke sivā

koi hamrah nahin rah ki mushkil ke siwa
hasil-e-umr bhi kya hai gham-e-hasil ke siwa

ek sannaTa musallat tha guzargahon par
zindagi thi bhi kahan kucha-e-qatil ke siwa

har qadam hadse har gam marahil the yahan
apne qadmon mein har ek shai rahi manzil ke siwa

tha misali jo zamane mein samundar ka sukut
kaun tufan uThata raha sahil ke siwa

apne markaz se har ek chiz gurezan nikli
laila har bazm mein thi KHalwat-e-mahmil ke siwa

apni rahon mein to KHud boe hain kanTe us ne
dushman-e-dil ki nahin aur koi dil ke siwa

apni taqdir tha barbaad-e-mohabbat hona
mahfilen aur bhi thin aap ki mahfil ke siwa

Source: Nashuneeda