maḳhfī haiñ abhī dirham-o-dīnār hamāre
miTTī se nikal ā.eñge ashjār hamāre

alfāz se khīñchī ga.ī tasvīr-e-do-ālam
āvāz meñ rakkhe ga.e āsār hamāre

zañgār kiyā jaatā hai ā.īna-e-taḳhlīq
aur naqsh chale jaate haiñ bekār hamāre

kuchh zaḳhm dikhā saktā hai ye rauzan-e-dīvār
kuchh bhed batā saktī hai dīvār hamāre

kyuuñ chaar anāsir raheñ pāband-e-shab-o-roz
āzād kiye jaa.eñ giraftār hamāre

kyuuñ shaam se vīrān kiyā jaatā hai ham ko
kyuuñ band kiye jaate haiñ bāzār hamāre

kyā aap se ab saḳhtī-e-be-jā kī shikāyat
jab aap hue mālik-o-muḳhtār hamāre

tahsīn-talab rahte haiñ tā-umr ki 'āzar'
paidā hī nahīñ hote taraf-dār hamāre

maKHfi hain abhi dirham-o-dinar hamare
miTTi se nikal aaenge ashjar hamare

alfaz se khinchi gai taswir-e-do-alam
aawaz mein rakkhe gae aasar hamare

zangar kiya jata hai aaina-e-taKHliq
aur naqsh chale jate hain bekar hamare

kuchh zaKHm dikha sakta hai ye rauzan-e-diwar
kuchh bhed bata sakti hai diwar hamare

kyun chaar anasir rahen paband-e-shab-o-roz
aazad kiye jaen giraftar hamare

kyun sham se viran kiya jata hai hum ko
kyun band kiye jate hain bazar hamare

kya aap se ab saKHti-e-be-ja ki shikayat
jab aap hue malik-o-muKHtar hamare

tahsin-talab rahte hain ta-umr ki 'azar'
paida hi nahin hote taraf-dar hamare