dasht-e-be-samt meñ ruknā bhī safar aisā thā
zindagī bhāgte guzrī mujhe Dar aisā thā

saañp lipTe hue shāḳhoñ se samar zahr-bhare
jis ke saa.e meñ lagī aañkh shajar aisā thā

raat bhar aag barastī hai havā jaltī hai
sochtā huuñ mire ḳhvāboñ kā nagar aisā thā

aks-e-ummīd bhī miltā na thā sahrāoñ meñ
aañkh tarsī thī sarāboñ ko safar aisā thā

DhūñDhtā huuñ use nīndoñ se tahī rātoñ meñ
haa.e vo shaḳhs ki jo ḳhvāb-e-sahar aisā thā

ab ki lauTā huuñ 'buḳhārī' to huuñ begāna sā
merā is shahr se jaanā to ḳhabar aisā thā

dasht-e-be-samt mein rukna bhi safar aisa tha
zindagi bhagte guzri mujhe Dar aisa tha

sanp lipTe hue shaKHon se samar zahr-bhare
jis ke sae mein lagi aankh shajar aisa tha

raat bhar aag barasti hai hawa jalti hai
sochta hun mere KHwabon ka nagar aisa tha

aks-e-ummid bhi milta na tha sahraon mein
aankh tarsi thi sarabon ko safar aisa tha

DhunDhta hun use nindon se tahi raaton mein
hae wo shaKHs ki jo KHwab-e-sahar aisa tha

ab ki lauTa hun 'buKHari' to hun begana sa
mera is shahr se jaana to KHabar aisa tha

Source: Book : Beesveen Sadi Ki Behtareen Ishqiya Ghazlen (Pg. 320)