phir se vo lauT kar nahīñ aayā
phir duā meñ asar nahīñ aayā

chain aa.egā kaise aaj kī shab
taare nikle, qamar nahīñ aayā

likhte dekhā thā ḳhvāb meñ un ko
ab talak nāma-bar nahīñ aayā

mere marne pe aayā saarā jahāñ
jo thā ik bā-ḳhabar nahīñ aayā

chal basī maañ liye khulī āñkheñ
us kaa, nūr-e-nazar nahīñ aayā

yuuñ to patthar bahut se dekhe haiñ
koī tum sā nazar nahīñ aayā

shaam Dhalne lagī hai ab 'muftī'
sub.h kā bhūlā ghar nahīñ aayā

phir se wo lauT kar nahin aaya
phir dua mein asar nahin aaya

chain aaega kaise aaj ki shab
tare nikle, qamar nahin aaya

likhte dekha tha KHwab mein un ko
ab talak nama-bar nahin aaya

mere marne pe aaya sara jahan
jo tha ek ba-KHabar nahin aaya

chal basi man liye khuli aankhen
us ka, nur-e-nazar nahin aaya

yun to patthar bahut se dekhe hain
koi tum sa nazar nahin aaya

sham Dhalne lagi hai ab 'mufti'
subh ka bhula ghar nahin aaya