kabhī bahut hai kabhī dhyān terā kuchh kam hai
kabhī havā hai kabhī āñdhiyoñ kā mausam hai

abhī na toḌā gayā mujh se qaid-e-hastī ko
abhī sharāb-e-junūñ kā nasha bhī maddham hai

ki jaise saath tire zindagī guzartī ho
tirā ḳhayāl mire saath aaise paiham hai

tamām fikr-e-zamān-o-makāñ se chhūT ga.ī
siyāh-kārī-e-dil mujh ko aisā marham hai

maiñ ḳhud musāfir-e-dil huuñ use na rokuñgī
vo ḳhud Thahar na sakegā jo qaidī-e-ġham hai

vo shauq-e-tez-ravī hai ki dekhtā hai jahāñ
zamīñ pe aag lagī āsamān barham hai

kabhi bahut hai kabhi dhyan tera kuchh kam hai
kabhi hawa hai kabhi aandhiyon ka mausam hai

abhi na toDa gaya mujh se qaid-e-hasti ko
abhi sharab-e-junun ka nasha bhi maddham hai

ki jaise sath tere zindagi guzarti ho
tera KHayal mere sath aaise paiham hai

tamam fikr-e-zaman-o-makan se chhuT gai
siyah-kari-e-dil mujh ko aisa marham hai

main KHud musafir-e-dil hun use na rokungi
wo KHud Thahar na sakega jo qaidi-e-gham hai

wo shauq-e-tez-rawi hai ki dekhta hai jahan
zamin pe aag lagi aasaman barham hai

Source: Book : siip-volume-47 (Pg. 53)