javānī kī umañgoñ kā yahī anjām hai shāyad
chale aao ki va.ade kī suhānī shaam hai shāyad

jo tishna thā kabhī saaqī vo tishna-kām hai shāyad
usī baa.is to nazm-e-mai-kada badnām hai shāyad

hañsī ke saath bhī aañsū nikal aate haiñ āñkhoñ se
ḳhushī to merī qismat meñ barā.e-nām hai shāyad

jise mai-ḳhvār pī ke mai-kade meñ raqs karte haiñ
tirī āñkhoñ kī mastī sāqī-e-gulfām hai shāyad

uḌaa.ī sham.a ne jab ḳhāk-e-parvāna to maiñ samjhā
mohabbat karne vāloñ kā yahī anjām hai shāyad

jo ab tak mai-kashoñ ke paas muddat se nahīñ aa.ī
abhī gardish meñ ḳhud hī gardish-e-ayyām hai shāyad

maiñ dānista ab un ke sāmne ḳhāmosh huuñ 'ja.afar'
ḳhamoshī bhī mirī ab morid-e-ilzām hai shāyad

jawani ki umangon ka yahi anjam hai shayad
chale aao ki wade ki suhani sham hai shayad

jo tishna tha kabhi saqi wo tishna-kaam hai shayad
usi bais to nazm-e-mai-kada badnam hai shayad

hansi ke sath bhi aansu nikal aate hain aankhon se
KHushi to meri qismat mein barae-nam hai shayad

jise mai-KHwar pi ke mai-kade mein raqs karte hain
teri aankhon ki masti saqi-e-gulfam hai shayad

uDai shama ne jab KHak-e-parwana to main samjha
mohabbat karne walon ka yahi anjam hai shayad

jo ab tak mai-kashon ke pas muddat se nahin aai
abhi gardish mein KHud hi gardish-e-ayyam hai shayad

main danista ab un ke samne KHamosh hun 'jafar'
KHamoshi bhi meri ab morid-e-ilzam hai shayad

Source: Book : SAAZ-O-NAVA (Pg. 123) Publication : Raghu Nath suhai ummid