na sar chhupāne ko ghar thā na āb-o-dāna thā
zamāne bhar kī nigāhoñ kā maiñ nishāna thā

bhulā na paayā use jis ko bhuul jaanā thā
vafāoñ se mirā rishta bahut purānā thā

jo aks-e-ġhair kī tābish meñ DhūñDtā thā jilā
us ā.īne ko bikharnā thā TuuT jaanā thā

darīche maazī ke khulne lage to yaad aayā
yahīñ kahīñ kisī Daalī pe āshiyāna thā

sile meñ kyā mujhe miltā jo aur ruk jaatā
tire ḳhutūt ko ik roz to jalānā thā

jahāñ pe tā.ir-e-fikr-e-suḳhan ke par silte
vahīñ pe aql-o-ḳhirad kā nayā Thikānā thā

lahū kā rañg chaTānoñ ke ābshāroñ meñ
unheñ nasheb meñ dariyā-e-ḳhūñ bahānā thā

qabā-e-surḳh siyah bādaloñ ne oḌhī thī
kisī ke jurm se parda unheñ uThānā thā

vo ek halke tabassum kī kaaT sah na sakā
sitam kā vaar bhī kis darja buzdilāna thā

tamām shorisheñ saffākiyāñ uruuj pe thiiñ
bil-āḳhir un ko adālat se chhūT jaanā thā

dukāñ lagā.e huuñ TuuTe hue khilaune kī
ki bhūltā nahīñ bachpan bhī kyā zamāna thā

na sar chhupane ko ghar tha na aab-o-dana tha
zamane bhar ki nigahon ka main nishana tha

bhula na paya use jis ko bhul jaana tha
wafaon se mera rishta bahut purana tha

jo aks-e-ghair ki tabish mein DhunDta tha jila
us aaine ko bikharna tha TuT jaana tha

dariche mazi ke khulne lage to yaad aaya
yahin kahin kisi Dali pe aashiyana tha

sile mein kya mujhe milta jo aur ruk jata
tere KHutut ko ek roz to jalana tha

jahan pe tair-e-fikr-e-suKHan ke par silte
wahin pe aql-o-KHirad ka naya Thikana tha

lahu ka rang chaTanon ke aabshaaron mein
unhen nasheb mein dariya-e-KHun bahana tha

qaba-e-surKH siyah baadalon ne oDhi thi
kisi ke jurm se parda unhen uThana tha

wo ek halke tabassum ki kaT sah na saka
sitam ka war bhi kis darja buzdilana tha

tamam shorishen saffakiyan uruj pe thin
bil-aKHir un ko adalat se chhuT jaana tha

dukan lagae hun TuTe hue khilaune ki
ki bhulta nahin bachpan bhi kya zamana tha