māntā nahīñ merī hujjateñ bhī kartā hai
baat baat meñ apnī jiddateñ bhī kartā hai

aag bhī lagātā hai aap apne dāman meñ
phir use bujhāne ko bārisheñ bhī kartā hai

ishq ḳhud se hai us ko aur ḳhud hī vo pāgal
apnā aap khone kī sāzisheñ bhī kartā hai

dil meñ jiite rahne kī aas baḌhtī rahtī hai
saath saath marne kī ḳhvāhisheñ bhī kartā hai

jāñ-kanī ke aalam meñ yaad kar ke pyāroñ ko
maut ke farishte se mannateñ bhī kartā hai

mujh se thoḌā Dartā hai paas yuuñ nahīñ aatā
bāqiyoñ se to akasr ḳhalvateñ bhī kartā hai

mujh se kahtā rahtā hai ḳhush rahā karo naañ tum
aur dil dukhāne kī harkateñ bhī kartā hai

baat bhī nahīñ kartā mujh se aur phir apnī
ek ek aadat meñ mantiqeñ bhī kartā hai

kuchh alag sā hai sab se kuchh ajab vo hai 'zehrā'
apnī har mohabbat meñ shiddateñ bhī kartā hai

manta nahin meri hujjaten bhi karta hai
baat baat mein apni jiddaten bhi karta hai

aag bhi lagata hai aap apne daman mein
phir use bujhane ko barishen bhi karta hai

ishq KHud se hai us ko aur KHud hi wo pagal
apna aap khone ki sazishen bhi karta hai

dil mein jite rahne ki aas baDhti rahti hai
sath sath marne ki KHwahishen bhi karta hai

jaan-kani ke aalam mein yaad kar ke pyaron ko
maut ke farishte se mannaten bhi karta hai

mujh se thoDa Darta hai pas yun nahin aata
baqiyon se to akasr KHalwaten bhi karta hai

mujh se kahta rahta hai KHush raha karo nan tum
aur dil dukhane ki harkaten bhi karta hai

baat bhi nahin karta mujh se aur phir apni
ek ek aadat mein mantiqen bhi karta hai

kuchh alag sa hai sab se kuchh ajab wo hai 'zehra'
apni har mohabbat mein shiddaten bhi karta hai