hoñT masrūf-e-duā aañkh savālī kyuuñ hai
dil ke mānind mirā zehn bhī ḳhālī kyuuñ hai

vo to nārāz hai mujh se to phir āḳhir us ne
muskurāhaT sī mirī samt uchhālī kyuuñ hai

us ko hairat mire sheroñ pe nahīñ is par hai
mere shāne pe jo chādar hai vo kaalī kyuuñ hai

vo bhī kyā din the tirī soch ko chhū saktā thā
ab tirā aks faqat aks-e-ḳhayālī kyuuñ hai

kyā batāoge ki ham meñ se vafā kis ne kī
tum ne mahfil meñ mirī baat nikālī kyuuñ hai

is irāde se meñ baiThā thā ġhazal likhne ko
sochtā huuñ tirī tasvīr banā lī kyuuñ hai

ab maiñ jaane nahīñ detā to burā māntī ho
is qadar pyaar kī aadat mujhe Daalī kyuuñ hai

honT masruf-e-dua aankh sawali kyun hai
dil ke manind mera zehn bhi KHali kyun hai

wo to naraaz hai mujh se to phir aaKHir us ne
muskurahaT si meri samt uchhaali kyun hai

us ko hairat mere sheron pe nahin is par hai
mere shane pe jo chadar hai wo kali kyun hai

wo bhi kya din the teri soch ko chhu sakta tha
ab tera aks faqat aks-e-KHayali kyun hai

kya bataoge ki hum mein se wafa kis ne ki
tum ne mahfil mein meri baat nikali kyun hai

is irade se mein baiTha tha ghazal likhne ko
sochta hun teri taswir bana li kyun hai

ab main jaane nahin deta to bura manti ho
is qadar pyar ki aadat mujhe Dali kyun hai